wêneyek ji bihara Cizîra Botan

*26ê Adara 2018'ê gava erebe berê xwe da nava bajêr kolon, hesin û karker ketin pêşîya me, li alîyê çepê jî li alîyê rastê jî. zêde hard înşaat.

*wek her carê dîsa zarok li kolanan e. her ku kêm dibin zarokên nû dibişkivin, ji vê axê ji vî şetê şerbetî.

Cizîra Botan, 2018

*çîwçîwa beytikan, şeqşeqa tizbîyan, pifkirina çixarê, hîkehîka hemoyê netimam, çikçika tovkê şebeşan, xuşîna bayê kur, xumxuma ava mezin...

*goristana bajêr weke hêwing-daristanekê xuya dike, gelek kulîlk şîn bûne rengorengo, dar bişkivîne, gîyê xwe li kabokê dide. keskahîyek hebe li vî bajarî ew jî ev goristan e û piçkokek baxçeyên malan û cotikê tûya.

*restorasyona birca belek kêm-zêde dewam dike, ew surh û bedenên girz ji bin axê derdikevin ser rûyê erdê.

*îro pêncşem e, herkes li hêvîya baraneka boş e. ji ber ku bajar di nava toz û gemarê de maye, hêvî dikin baranek boş bê hinekî ev toza li hewa wê kêm bibe.

*zêde bûne, zehf zêde bûne. di nava goristana Cizîrê de kevirê ber serîya yên tarîxa mirinê "2015" zêde bûne, tu berê xwe bidî kîjan quncikê yek heye....

şetê şerbetî, 2018

*şevên vî bajarî nadim hezar şevên demûşî yên metrepolan. asîmanê dilê vî bajarî têr-stêrk e, yên bixwazin bibînin bi çavên serê xwe kerem kin û werin bibînin ka ew stêrkên li asîmanên vî bajarî çawa li dîjleyê diîsin.